Bu gün səhər saatlarından etibarən “Müqavimət” hərəkatı İrəvanda itaətsizlik yürüşlərinə başlayıb.

Parlamentinsesi.az erməni KİV-ə istinadən xəbər verir ki, Kiyan küçəsi hər iki tərəfdən bağlanıb. Əraziyə çox sayda polis qüvvələri sövq edilib.

Qeyd edək ki, dünən Milli Məclisin vitse-spikeri, “Ermənistan” fraksiyasının deputatı İşxan Saqatelyan bu gün, mayın 10-da saat 12-də 4 istiqamətdə itaətsizlik yürüşləri və aksiyalarının başlayacağını açıqlamışdı.

Bundan başqa, saat 19:00-da Fransa meydanında yekun mitinq keçiriləcək.

Xatırladaq ki, mayın 2-də İrəvanda dinc etirazlar başlayıb, hər gün bir sıra küçələr bağlanıb. Mayın 2-dən İrəvanın Fransa meydanında mitinqlər keçirilir.